നാല്‍പ്പത്തിരണ്ട് കോടി രൂപ മുതല്‍ മുടക്കി ജര്‍മ്മനിയില്‍ നിന്ന് ഇറക്കുമതി ചെയ്ത 18000 സ്പിണ്ടിലുകളും 30 എയര്‍ ജെറ്റ് ലൂമുകളും ഉള്ള ഒരു അത്യാധുനീക മില്‍ ഉദ്ഘാടനം നടത്തി യ ശേഷം അഞ്ചു വര്‍ഷം പൂട്ടി കിടക്കുക , സ്വാഭാവികമായി യന്ത്രങ്ങള്‍ പലതും കേടു പറ്റി . എന്നിട്ടിപ്പോള്‍ 6 കോടി കൂടി മുടക്കി 4800 സ്പിണ്ടില്‍ പ്രവര്‍ത്തന ക്ഷമമാക്കുക , കൊട്ടിഘോഷിച്ചു ഉദ്ഘാടനം നടത്തുക , കോമളപുരം സ്പിന്നിംഗ് മില്ലിന് ശാപമോക്ഷം എന്ന് പത്ര പരസ്യം കൊടുക്കുക , ഇതൊരു കെട്ടുകഥ അല്ല , യു ഡീ എഫ് ഭരണത്തില്‍ എന്‍റെ മണ്ഡലത്തിലെ ഒരു മില്ലിന്റെ കഥയാണ് .
കേരള സ്പിന്നേഴ്സ് 1961 ബിര്‍ള സ്ഥാപിച്ച ഒരു മില്‍ ആയിരുന്നു . എണ്‍പതുകളില്‍ അത് മറ്റൊരു മാര്‍വാഡി വാങ്ങി . മില്ലിന്റെ ചോരയും നീരും ഊറ്റിയെടുത്തു അസ്ഥിപന്ജരം ആക്കി ഒരു ദിവസം അവര്‍ മില്ലും പൂട്ടി നാട് വിട്ടു . അഞ്ചു വര്‍ഷം യു ഡീ എഫ് ഭരിച്ചു , ഫാക്ടറി അടഞ്ഞു തന്നെ കിടന്നു , എല്‍ ഡീ എഫ് ഭരണം വന്നു , പല വട്ടം അനുനയിപ്പിക്കാന്‍ ശ്രമിച്ചെങ്കിലും മാര്‍വാഡി വഴങ്ങിയില്ല . അവസാനം ആത്മഹത്യയുടെ വക്കില്‍ എത്തിയ തൊഴിലാളികളെ സംരക്ഷിക്കാന്‍ ഇടതുപക്ഷ സര്‍ക്കാര്‍ തന്നെ പത്ത് കോടിയോളം രൂപ തൊഴിലാളികളുടെ പീ എഫും ശമ്പള കുടിശികയും ആയി നല്‍കി . ഒരു പക്ഷെ ആദ്യമായിട്ടായിരിക്കും ഒരു സ്വകാര്യ ഫാക്ടറിയുടെ ബാധ്യതകള്‍ സര്‍ക്കാര്‍ ഏറ്റെടുക്കുന്നത് . നിയമ നിര്‍മ്മാണത്തിലൂടെ കമ്പനിയുടെ വസ്തവകകള്‍ സര്‍ക്കാര്‍ ഏറ്റെടുത്തു . മുതലാളി കേസിന് പോയി . അനധികൃതമായ അടച്ചു പൂട്ടല്‍ തുടങ്ങിയ കാലം മുതലുള്ള തൊഴിലാളികളുടെ ശമ്പള കുടിശിഖ നല്‍കണം എന്ന് ആവശ്യപ്പെട്ടു സര്‍ക്കാര്‍ കേസെടുത്തു . അതോടെ മുതലാളിയുടെ പ്രതിഷേധവും അടങ്ങി .
കെ എം എല്‍ എലില്‍ നിന്ന് 24 കോടി രൂപയം ഏതാണ്ട് അത്ര തന്നെ സര്‍ക്കാരിന്റെയും പണം മുടക്കി ഫാക്ടറി ആധുനീക വല്‍ക്കരിച്ച് പുനരുദ്ധരിക്കാന്‍ തീരുമാനിച്ചു . ഒരു വര്‍ഷം ഒരു ദിവസം പോലും മുടങ്ങാതെ ഫാക്ടറിയുടെ നവീകരണ പ്രവര്‍ത്തനങ്ങള്‍ നടന്നു. കെട്ടിടങ്ങള്‍ നവീകരിച്ചു . പുത്തന്‍ യന്ത്രങ്ങള്‍ സ്ഥാപിച്ചു. ടെസ്റ്റ്‌ നടത്തി പുതിയ തൊഴിലാളികളെയും റിക്രൂട്ട് ചെയ്തു . നിശ്ചിത വയസില്‍ താഴെയുള്ള പഴയ തൊഴിലാളികളെയും നിയമിക്കുന്നതിനു ധാരണയായി . പക്ഷെ ചില സാങ്കേതിക കാരണങ്ങള്‍ കൊണ്ട് ഇലക്ട്രിക്ക് കണക്ഷന്‍ കിട്ടിയില്ല . ജനറെറ്റര്‍ വച്ച് യന്തങ്ങള്‍ പ്രവര്‍ത്തിപ്പിച്ചു ഉദ്ഘാടനം ചെയ്യാന്‍ തീരുമാനിച്ചു. അപ്പോഴാണ്‌ നിയമനം സംബന്ധിച്ചു ഒരു കേസ് വന്നത് . മുന്‍ തൊഴിലാളികളെ ഉപയോഗപ്പെടുത്തി ഫാക്ടറി തടസമില്ലഎന്ന് കോടതിയും പറഞ്ഞു. അങ്ങിനെ 2011 ഏപ്രിലില്‍ ഫാക്ടറി തുറന്നു .
യു ഡീ എഫ് ഭരണം വന്നു . ഇലക്ട്രിസിറ്റി കണക്ഷന്‍ കിട്ടാന്‍ 4 വര്‍ഷം എടുത്തു . കേടു വന്ന യന്ത്രങ്ങള്‍ കുറച്ചെണ്ണം നന്നാക്കിയെടുക്കാന്‍ മറ്റൊരു 6 മാസം . കോടതിയിലെ കേസ് തീര്‍ക്കാന്‍ ഇനിയും സര്‍ക്കാരിനു കഴിഞ്ഞിട്ടില്ല . അവസാനം മുന്‍ തൊഴിലാളികളെ വച്ച ഫാക്ടറി 5 വര്‍ഷത്തിനു ശേഷം വീണ്ടും ഉദ്ഘാടനം ചെയ്തു . ശാപ മോക്ഷം കിട്ടി എന്നാണ് അവകാശവാദം . പക്ഷെ യാഥാര്‍ത്ഥ്യം മറിച്ചാണ് . വലിയൊരു ശാപ ഭാരവും പേറി കൊണ്ടാണ് പുതിയ ഫാക്ടറി പ്രവര്‍ത്തനം തുടങ്ങിയിരിക്കുന്നത് . 5 വര്‍ഷത്തെ പലിശയായും , കേടായ യന്ത്രങ്ങളുടെ അറ്റകുറ്റപ്പണികള്‍ക്കും ആയി 10 -20 കോടി രൂപ ചെലവ് വന്നിട്ടുണ്ട് എന്ന് കണക്കാക്കുന്നു . ആരാണീ നഷ്ടത്തിന് ഉത്തരവാദി ? എന്ന് എന്‍റെ അധ്യക്ഷ പ്രസംഗത്തില്‍ ഞാന്‍ ചോദിച്ചു നിര്‍ത്തി .
ഒരു വാല്‍കഷണം കൂടി . 2011 ഏപ്രില്‍ മാസത്തില്‍ മില്‍ ഉദ്ഘാടനം ചെയ്തപ്പോള്‍ മറ്റൊരു ഫാക്ടറിക്ക് കൂടി ഇതേ കോമ്പൌണ്ടില്‍ തറക്കല്ല് ഇട്ടിരുന്നു , ഗാര്‍മെന്റ് ഫാക്ടറിക്ക് വേണ്ടിയുള്ള ഒരു ബഹുനിലക്കെട്ടിടത്തിന്റെതയിരുന്നു അത് . നൂല്‍ , തുണി , ഉടുപ്പ് എന്നിവയുടെ ഒരു സംയോജിത ഉല്‍പ്പാദന കേന്ദ്രം ആയിരുന്നു ലക്‌ഷ്യം . നൂലും തുണിയും ഉണ്ടാക്കുന്ന ഫാക്ടറിയുടെ കഥ മേല്‍പ്പറഞ്ഞത്‌ ആണെങ്കില്‍ ഉടുപ്പ് ഫാക്ടറിയുടെ കാര്യം പറയാന്‍ ഇല്ലല്ലോ. അതിന്റെ തറക്കല്ല് പോലും ഇപ്പോള്‍ കാണാന്‍ ഇല്ല
Sign up here with your email